ياسلام يادكتور

أظـن ، ياملهمـانـى الفـن والأشعـــار.
وقلبى : بلاصــك ، اللى بتطلعى به الفجر ..
من بعد اذنك ، بلاش – النوبه – م الترعـة ،
امليه لى من عند ابو البالطـو النضيف لابيض ،
وقولى له ، يازينة الجدعان ، صباح الخـير ..

حلال عليك المـدارس ، والأدب ، والعلـم ،
حلال عليك غلب أهلك فيك ، عشان تكبر ،
وتبقى عالـم ، حكيم ، تشفى البلد م الداء ..
وتقول: يا " بلهارسة"، ياهارسه القلوب، روحى ،
وتعالوا يا فلاحين ، خـدوا بعض بالأحضان.

الفلاحيـن صـفر ، لـكن صـلبهـم جامـد ،
شـالوا الجبـال ، قلقلوهـا ، وهـم لسه صفر ،
اشحال بقى ، لما يجـرى الـدم فى خدودهم ،
بدال ما يجرى – مع الروح نفسها – فى البول.
وقولى له : يازينـة الجـدعان ، براوه عليك ،

ندرن علينـا ، نهـار ما بالسـلامـه نقـوم ،
لنعملوه عيـد ، وترقص فيـه أمـواتنـا ! ..
أجدادنـا من عهد فرعون ! .. كلهم نادريـن ،
م المـوت يقوموا ، وييجوا ، ينقطـوا الزفة !
يا سلام يا دكتور .. ده يوم زى " الجلاء " ذاته.