موال عشان القنال

يـجـعل كـلامى فـانـوس وسـط الفرح قايد
يـجـعل كـلامى عـلى السـامـعين بـفوايـد
يـجـعل كـلامى ولا نـاقـص ولا زايـــد
احـنـا فى وقت البنا مـاحناش فى وقت كــلام
يـجـعل كـلامى حـجـاره ومـونـه وحـدايد

فين الكـــلام اللـى زى الـــورد والـحنـه
أرميــه ســـلام وانقـله مـواويـل تتغنــى
على شـبـاب انقتـل فى حـــب أوطــاننـا
شـال السـلاح فى يـمينـه وقـال يـا بـلـدى
نـدرن عـليـا لاخليــكـى ولا الــجنــه

وان عشـت يـا مصـر لامشـيـكى بـرجـليا
اهـدى مـراكـب مـحبـه للســواحــليــه
واهـدى البحـاروه بــحب عينيـا بـإيـديــا
واهـدى الصـعايـده بأنفاسـى نسـيم وســلام
واخـلى قـلبى حـديـد واهـدى الصـنايـعيـه

شـال السـلاح فـى يـمينـه وقـال يـا بـلداه
جـالـه الرصـاص من شـمـاله مال .. يا ولداه
قـام مـن وراه ألـف من شـال السـلاح وفـداه
حـل العـدو عن بـلادنـا وأصـبحت حـــره
آدى سـبب مـاالجـدع بيقول يــا بـلـــداه

عينـى رأت فى نـواحـى دنشـواى أفـراح
لـمـا اللـى دق المشـانـق فيهـا راح وانـزاح
وكـل فـردة حمـام طـارت بـألف جـنــاح
حتـى المشـانـق بـقت يـوم الجـلاء مراجيح
وسـمعت صـوت غنـوة الفـلاحـه والفـلاح

يـا حـمـام البـر سـقف
طـــــــير وهفهف
حــوم ورفـــــرف
عـلى كــتف الحـر وقف
والــقـــط الـغـلـه
سـلامـات يسـعد صباحك
دى بـلـدنــا
خـد بـراحك
يـا حـمـام افـرد جـنـاحــك
تسـلم انشـالله
يـا رفـاقـه الـجـو خــالى
وحـمـامـنـا
فـى العـلالى
يـامـا كـان الـدم غــالى
والطـبيب الله
يـامـا راح نسـمع بشـاير
طـلى يـامـه
يـام صـابر
مـا بقـاش ع الجسـر غادر
مـاشـى يتسـلى
مـا بقـاش ع التـل غيرنا
والـحبــايب
بتنـاصــرنا
يا حمـام انـزل فى خيرنـا
والـقـط الـغـله

حـل الـعـدو عـن بـلادنـا سـالمه يا سلامه
وخـلاص ماعدنـاش فـى دارنـا غرب ويتامى
الـخيـر حـايبقـى حـدانـا فـى البـلـد ياما
لما تـزيـد الغيطــــان ونقيم مصــانـعنـا
الـخيـر يــكفى الـجميـع ونـعيش بـكرامه

فـين الــكلام اللـى زى الفـل واليـاسـمين
على حـبـايب نـعسـنا وبـاتـوا سـهرانين
صـاحيين ولـكن قصـادهم حـلـم للصاحيين
ع النيـل نـقيم سـد عـالى هنـاك ورا أسـوان
عشـان تـزيـد الغيطـان ويشـبعوا الـجعانين

بـاتـوا العيـون سـهرانين يبنـوا ف خيالهم سد
من حـبـهم فى الـوطـن .. السـلك منـه اتمد
والـكهربـا وصـلوهـا لـحـد آخــر حــد
طـلع الـحـديـد م الصـخور ومصـانع اتقامت
طـلع النهـار ع الأمـل خـلـى الأمـل يشـتد

الســد عـالـى وغـالـى مين يـرسـملنـا
حـلف الـخـواجــا مـا يتقـدم ويـديـلنـا
غـير لـمـا يـمـلك غيطـاننـا ونـخلنا ونيلنا
قفلنا بـابنـا فـى وشــه وقلنا روح يـاديـب
النـدل نـدل الـمثل بيقـول ويـحــكى لـنـا

خـلاص ما عدناش نطيق عيشة المرض والجوع
نشـقى ونـهلك لمسـتعمر خسـيس ونصوع
إحـنـا اللى خلصـنا ع الاقطـاعى والمقطـوع
خـلاص رمينـا المـذله مـن ورا ضـهورنــا
ورفعنـا راســنا واصـبح حسنـا مســموع

الشـعب كـلـه نـطـق بلسـان زعيمنـا جمال
قال إحـنـا نـاس أغنيـا وبـلدنـا فيهـا قنـال
إحـنـا اللى عـاملينـه واحـنـا أحـق بالأموال
ميـه وعشـريـن ألـف مـاتـوا وهـم بيمدوه
ولـمـا عـاد القنـال الشـعب غنــى وقــال

يـا ســـايـق الـغليــون
عـــدى القنــال عـــدى
وقبــل مـــا تــعــدى
خــــد مــننـــا وادى

ده اللـى فـحت بـحـر القنــال .. جـدى
بـحـر القنــال يــا كتـرهـا رمـالـه
وجـدنـا فــوق الـــكتـاف شــالــه
بـحـر الـقنـــال اتبـدلــت حــالــه
وجـدنــا مـتهنـــى بـــعيــالـه ...

واحـنـا على الشــطين
مفـتـحـين الـعـيـن
عـارفين طريقـنا منيـن
واللى صــديقنـا فيـن
يا سـايـق الـغليـون

دى أرضــنـا .. وأرضــنـا لينــــا
ضــرب الرصــاص للى يـعـادينــــا
دى أرضــنـا وتــرابهـا أجـــدادنــا
ضــرب الرصــاص للى يـعـانـدنــا


النـخـله للطــالـع
والأرض للـــزارع
وبــكره للصـانـع
والـكون أهـو سـامع
يا ســايق الغــليون


المـال حــلال ... دم وعـرق ودمــوع
يــا بنــايين ابنـولنــا فى المشــروع
المـال حــلال حــا يرخـص الغـالــى
يـا بنــايين ابنـولنــا فـى الـعـالـى

المسـطـرين فى الإيــد
والـعـزم عـزم حـديـد
حـانبنـى عـهـد جـديد
ونـعيش زمـاننـا فى عيد
يـا ســايـق الـغليـون


الشـعب واقف على شـط القنـال ... كـلـه
وكـل غليـون يفوت ينــده لـه ويـقول لـه
سـيب اللى مغلـول يـموت من حسرته وغله
إحـنـا حـفرنـا القنـال بإيدينـا واسـناننا
وطـردنـا منـه غـريب ما بقاش حايوصل له


سـيب اللى مغلـول فى لندن وف باريز مغلول
يشـد شـعره ويصـرخ م القـرون مخلول
يـهـاتـى .. لم حد يسـمع صـوته مهما يقول
هـو حـايلطـم ويـخبط راسـه فى الحيطـه
واحنا حانمشى ف طريقنا للهدف على طول


ايــدن يقــول:

إزاى قـنـاة السويـس يـا اخـواننــا تتأمم
ده مـوش كـلام .. أمـال احنا ازاى حانتسمم ؟
ناكـل منين ؟ بـعدمـا عدمناكـى يا أسـهم ؟
مافيش كـلام زى ده . يـاللا ابـعتوا الاسطول
يقف قصـاد مصـــر .. عند الأمـر يتقدم !


شعـبـان يقـول :

بـاردون يـا إيـدن أنـا راجـل عـلى قــدى
لـكن حـاجـاوب عليك واخـد معــاك وادى
مين اللى شـال بـالغلق على كتفه ؟ مش جدى ؟
مين اللى سف التـراب والوحـله ؟ مش جدى ؟
مين اللى مـات م البـلاوى الزرقا ؟ مش جدى ؟
والميـه دى ماشيه فين ؟ مش ماشيه فى بلادنا ؟
خــلاص يـا إيـدن آدينــى قلت لك ردى


ايــدن يقــول :

لـكن دى شـريـان مهم عشــان بريطـانيا
وفـوق كـده لسـه فيه بـرضـه حاجات تانيه
بخصـوص فـرنســا وأمـريكـا وألمـانيـا
ما أقـدرش أسـيب القنـال فى إيد جمال وحده
أحسن حاجات " موش كويس " تجرى فى الدنيا


عوضين يقـول :

إزاى تـجيب سـيرة الشـريـان وانـا جــزار
عمـرى ماشفتش خـروف أو عجـل والا حمـار
له عـرق نـاقـص .. وموجـود عند سـابع جار
كـل البهــايـم عــروقهـا جـوه جتتـهـا
أمـا أنت راجــل علـى رأى الـمثـل فشـار

ايــدن يقـول :

أضـمن منين المــلاحـه تسـير بـحـريــه
وان العـواقب ســليمـه ميــه فـى الـميــه
لازم قنـاة السـويس مـاتـكونش مصــريــة
لازم قنـاة السـويس إحـنـا اللـى نـحـكـمها
ونـديـر شـئونـهـا وتبقــى الاســم دوليــه

جـابـر يقـول :

مـن صـغر سـنى وأنـا ريـس علـى الـميـه
شـايـف جــميع المــراكب والمـراكـبيــه
رايـحـه وجـايـه فـى خيـر وسـلام وحـريه
مـن بـور سـعيـد للسويس لـم فيـه ولا قـارب
الا وانـا بـقلبـى حـارسـه وشـايـله فى عينيا

بـلاش يـا إيـدن تقول حــريـه وتـدجــل
ده كـل شـئ فى التاريخ مـكـتوب ومتسـجل
وانت حســابـك مـع الـحـريـة متأجــل
بـلاش تقول اسـمهـا واسـمع زعيمنـا جـمـال
وهو بـيـكـلم الأحــــــرار وبيجـلجـل

ايــدن يقـول :

هـاتـوا الـدول تـجتمع فـى الـمؤتمـر هـاتوا
هــاتــوا دالاس بـالعجـل مــن دولارات
وهـاتـوا بينـو يـعينـه فـى منـــاوراتــه
ايــاك نـعـود للقنــال بحكـايـة التـدويـل
ويـعـود لنـا عـهـد لاسـتعمار ولــذاتـــه

محمـود يقـول :

خـلى الـدول تـجتمع فـى الـمؤتمـر خـلـى
يـحـكم دالاس ع الــدول ويقـول ويـمللــى
يـحـكم علينـا ويـعــزل فينــا ويــولــى
دى مـؤامـره مش مـؤتمــر واحنا مانقـبلهـاش
واحنا مـا نـعرفش مــؤتمــرات تــرلللـى !

اتـلمـوا فى الـمؤتمــر وانـفضـوا واتـلمـوا
ســبع ليـالــى ولا اتـفقـوا ولا اتـلمـوا
وقف دالاس يـقتــرح .. شـبيلوف حبس دمـه
وعـم بينـو وقف يـــاخـد بـإيـد عمـه
كـريشـنا قـام لـه وراح واخـده علـى مشمه
إيـدن صـبح يبـكـى من قـهره ومـن غمــه
يـا ميت نـدامـه عليك يـا مؤتـمـر لنــدن
حتـى اللـى راكــن عليك زودت لـه هـمـه

فين الـكـلام اللـى زى الشـومـه والنبــوت
ينـزل على اللـى معادينـا المـجـرم الممقوت
اللـى على نـهبنــا وســـلبنا حـايمـوت
إيـدن زعيـم الـدجـل .. أبـو شـنب فضــه
شـايب وعـايب .. خــدوه ياولاد حـارتنـا توت

قـالــوا العـيــال :

يـا ولاد حــارتنــا تــوت
هـاتــوا قــوام نبــــوت
يــمــوت البــرغـــوت
إيــدن خــلاص حـايمـوت
حـايمـوت مـن الـخضـــه
أبـــو شـــنب فضــــه
تـفيــت عـلـى شــنبــه
قـام الشـــنب صــــدى
صـــدى بـقـى خـــرده

يــا مصـــر يــا ورده
شـــــال الــحمــــام
حـــط الــحمــــــام
عـلى كــل إيـد فـــرده


يـا مـيت حـلاوه عليك يا جنس بنـى آدم
غصـبن عن اللى عـديـم الأصـل بنى آدم
الـوحش سـعران وبرضــك إنت بنى آدم
دالاس وبينـو وإيــدن سـعرانين ووحوش
واحـنـا معـانـا عليهـم كـل بنـى آدم


يـا ميت حــلاوه عليك يـا أخ يـا عـربى
دقـيت طـبولك وقـلبك دق بـالعربــى
وحـملت مـدفـع معانـا وقلت بـالعربـى
عـاشـت قناة السويس مصــريه عـربيـه
طــول ما ف بـلاد العرب من قال أنا عربى


يـا ميت حـلاوه عليك يـا جزايرى يا ثـاير
يـاللـى ماعـدتش تشوف لا بيوت ولا سراير
وان قـال جـمـال أدبـى الأنـدال على بينو
تـخلى كـاس المــرار ع المعتديـن دايــر


يـاللى بـدعتو السـلام على شـط نهر السند
ياللـى انتو ويانا ايـد على ايد وزنـد ف زند
واقفيـن مـع الحـق ضـد الافـترا والعنـد
بـانـدونـج لمت شـعوبها المخلصـة وقالت
عليـكـو منا السـلام يا سـاكنين الـهنـد


بـانـدونـج من أندونيسيا سـاقت المراسـيل
يـردوا فى الـمؤتـمـر ع الكدب والأباطـيل
ثـابتين فى وسـط العواصف أقوى م الأساطيل
سايرين مـع الـحـق والـحـريـة بيدافعوا
عن كـل نـخـله وعود أخضر فى وادى النيل


وسـمعت م الشـرق صـوتك يارفيق شبيلوف
طـالع مع الشـمس طـايف ع الممالك طوف
يـرمـى الفزع فى القلوب المجرمه والخوف
واقف فـى صـف الشـعوب حـافظ تعاليمك
وشـعب روسـيا ميتين مليون رفيق شبيلوف


وخمسـميت ألف ألف اتطـوعوا فى الصـين
شـايـلين سـلاحهم عشـاننا ومسـتعـديين
إن مصــر نـادت فى ليله يصـبحوا جايين
وإن كـل واحـد نفخ نفـخه تـهب ريـاح
مـاتخـلى فـوق الوجـود مسـتعمرين حيين


وحتى فى انـجـلترا .. سمعت نـاس أشراف
واقفـين لإيـدن يقولوا كـفايـه يا خطـاف
سـودت عيـشـة بـلدنـا بلعنـة الأحــلاف
إرمـى السـلاح من يمينـك واسـمع الكلمـه
لازم علم مصــر يفضـل ع القنال رفـراف


وسـمعت صـوت بيتـكـلم فرنســـاوى
بيـرد ع المفتـرى ويقـول بصــوت داوى
عمال فـرنسـا مـاينخـدعوش بـدعــاوى
عمال فـرنسـا وشـعب فـرنسـا ويا الـحق
والـحـق له نـاس بتـتـكلم فـرنســاوى


الـحـق له نـاس بتتـكلم بـكـل لسـان
عـارفين مقـام الحيـاه عايشين فى كل مكان
يـكافحوا لجـل السـلام وسـعادة الإنســان
مـايعرفوش فـرق بين أسـمر وبيـن أشــقر
الـكـل لازم يعـيش .. لازم يعـيش فى أمـان


إيـدنـا فى إيـد كل من طلق الحمام فى سماه
إيـدنـا فى إيـد كل من نصـر السلام وحماه
إيـدنـا فى إيـد كل من جـاد للسـلام بدمـاه
إحـنـا ورانـا شـعوب الأرض سـانديننـا
واللـى وراه الشـعوب يـا فـرحتـه وهنــاه


فـين الــكلام اللـى زى الـدم لمـا يسـيل
من قلبـى يفضـل يدوى ف سمع جيل ورا جيل
لحـد آخـر الزمـان يـجـرى فى موج النيل
ويطير حـمـامـة سـلام على مصـر والدنيا
يــروى حـكاية بـلدنـا وينـشـد المواويـل