التفريقة

أنا بغبغـــان من "أفـريقــه".
حـافظ نصـوص كهنـه عتيقـه.
بحـريـن وست جبـال عـديت ،
قـزحت نص الدنيـا ، وجـيت..
اللى لقيتـه ف أمــريقـــــه

نفس الكــلام ..
نفس الكــلام ..
نفس الكــلام ..


( 1 )

"كلام الرجل الأبيض"
أبيـض ، وفنطــازيـــه
ومـراتـــى المظيــــه
وربنــــا اصـطفـانــا ،
عشـان حمــرة قفـانــا ،
وشيلنــا الأمــانـــة ،
اللـى تقــل الـرزيــــة.


( 2 )

" كلام الرجل الأسود "
أسـود ، ودمـى حـامـى ،
حـامـى الحمى يا حامى ،
مافيناش لـونـكم ولـوننا،
الــكون ده كـله كوننا ،
مـامـا مـديـاهولنــا …
ومشهــده المحــامـى.


( 3 )

" كلام الرجل المحامى "
محـامى كبيـر قانونجى ،
وفى الــكلام بـرنـجـى
شـايب وشـكلى رائــع ،
فـاهـم كـل الشرائـع ..
لابيض – وده رأى شائع –
أبيض ، والزنـجى زنجـى


( 4 )

" كلام الولد الأبيض "
والله " الجلاس " ما ادوقه ،
يا الزنجى ينـول حقـوقه !
تلميـذ ، وبـاستهجــى ،
لكن فى الــرأى .. حجه ،
العـالـم بــده رجــه ،
عشــان تمسـح فروقـه !


( 5 )

" كلام الرجل الأفريقى "
يا ليـل .. والبـدر .. بمبـى ..
يا ليـل .. وألـم فى جنبـى ..
يا ليـل .. مقـدرش انـام بـو ..
يا ليل .. و "لومومبا " قام بـو ..
يا ليـل .. أنا سجنى بـامبـو ،
وان ماكسرتوش .. ده ذنبـى !


عزيزى درش ..
زعـلان قـوى من "أمـريقـه" ؟
علشــان حـكاية التفـريقــة ؟
عــاوز صــراحـة وحقيقـة ؟
الحــل يابنـى ف "افــريقه" !
الأصـــل لمـا يـــــزول.
الظــــل برضــه يــزول !
سـلـم على خـالتـى شفيقــة !