فى الجنة

ابـريــق دهــب
ومخده من ريش النعام ..
تشرب سيادتك ، تنجعص آخر غرام ،
ترفع عينيك تـلاقى منجـه مدلدله ،
وفـاكهــــه يــامـا ، متلتلــه
أصناف من اللى الكليو مش عارف بكام ،
منجه ، وفراوله ، وموز ، وتفاح ياوله ،
وخـوخ وبـرقوق م التمام
يــــــاللعجب ،
البرتقان ويا العنب ،
فى غصن واحد .. يا سلام !

جلا جـلا ، يامحتـرم جـلا جـلا.
كــل الأمـــور متســهلــه.
تطلب حواجب نمل ، والا قلوب دبب ،
تحضــر ، بســرعـة مــذهلة ،
ماعليكش إلا بس تفضـل تشتهـى ،
تطـلب وتطـلب فى حاجات لا تنتهى
كـله يجــــاب ،
ماهى جنه طبعـــا يا مهــاب ..
لكن مافيش غير بس شئ واحد وحيد
لـو تطلبـه ، لا يستجـــــاب ..
أنك تعوز تخـرج من السور الحديـد.