طرزان

يــــــــوم الـخمـــيــس،
واللـــب، والأحــلام، فـى كـيس
طـــرزان بـيغـطس فى الـهويس.
طـــــــــرزان جــــدع،
طــــــرزان شـــديــــد،
دراعـــــه أجمــد م الحـديـد.
قـزقـزت نــص اللــب، هــاه ..

طـرزان بيصـرخ: عـا عـا عـاه ..
خــــنـــــق الأســــد،
طـحن الـدمـاغ، عـجن الجـسـد ..
قـرقشـت بـاقى اللب، من غير قزقزه،
طـرزان صـرخ قـال: عـاعـاعاه..
صـــرخـت أنــا كـمــان وراه.

ولـمـا قال لشيتا: يا امـه زغرطى ..
وحـط رجله ع التـعيس، فـوق التراب،
حطيت معاه رجلى ، بدون جزمة وشراب،
ورسمت بعـيون الخـيال، بدل الأسـد،
محمود أفنـدى حسين .. مدرس الحساب

احنا التلامذة

يـا عـم حـمـزه ،
احـنا التـلامــذة.
جن وبلاوى مسيحه – من غير مؤاخذه ـ
نـكبر مـا نكــبر،
الله أكــــــبر،

طول الزمان ع الامتحان داخلين مبارزه!
هل من مـبـارز؟
هل من مناجــز،
هل من معارك فى البلد دى ، لسه عايـزه؟
هل من منــادى؟
ونفير جـهــادى؟
قال لك: أجل! .. لسه العجل فى رمله غارزه!
لسه فى طــريقـــنا للأمــــال،
والـرمله مــن كــل جــهــــه..
زقــه مـــع زمــيـلكم جـمـال،
يــا عـقـولـنـا يـا مـتـنـبهـه!
الـرمله حـلـوه ع الـبــــلاج،
حـلـوه عـلـى بــاب الـفــرح،
لكـن لـحـد كـده وبــــــلاش،
أحــسـن شـعــورى بـينـجرح.

اسفخص عـلى لــون الاصـــفرار
والـفقر، والـخــوف والـمـــرض
مـاشـفـتـه الا ودمـى فـــار،
وحلـمـت بـيـه زال ، وانـقـرض.
كابـس عليـنا الشــئ ده لــيـه؟
هـو انـجليز؟ ..
والا تتـــر؟ ..
دوكهم خـطـر، قـمنـا عليـه ،
ريـاح مـا خلتلوش أتـــر.

. . كان برضه أمـشيـر زى ده،
كان برضه فـبرايـر كــده،
قمنا جـموعــا حــاشـده،
سـلاحـنـا أنـشـودة فـدا..
احنا الجـواب، واحـنا الـنـدا،
واحنا الـتـلامذه الـمـنجده ..
يا عم حـمـزه مـاشـفتناش؟
. . الـدنـيـا شـافت دمـنـا،
حنه ، علـى ايـديـن أمـنـا،
حلفت يكـون عـيـد باسـمـنا،
عيد ، ابتدا ولا انـتـهـاش ..
يا عـم حـمـزه ،

" لا مـــــاليـف *" وهــمــزه
لأ . . مش عاوزين عيشـة وارثين
ولا دنــيـا جـاهـــــزه.
ده أبو ســـد عالى،
سهــران ليـــالى،
زى التلامذه ف لامتحان ..
يـا عـم حمــزه.

* لاماليف : يعنى " لا "

أجمـل مافيهـم

يـا بنـت يـام الـمـريلـه كـحـلى ،
يـا شمـس هـالله ، وطـالله م الكـولـه ،
لـو قلــت عنـك فـى الغـزل قـولـه ،
ممنـوع عـليــا ، والا مسمــوح لـى؟

أنـا احب اقـول الشعـر فى الحــلوين ،
والحـلـو اقـوله : يا حـلو، فى عيونـه ،
ولـو ابـتــديـت بشفـايفـك النـونـو ،
مـايـكفـيـنـيش فيهـم سبـع دواويـن !

يـا مـلاك يـا جنيه، يـا سـت الحسـن ،
يـعـجـبنـى توهـانـك فى أحلامــك ،
يـعـجـبنـى شد الخصـر بحـزامـك ،
يـعـجـبنـى أخدك للكـتب بالحـضـن .

.. راحـوا الصـبايـا، والصـبايـا جـم ،
أجمـل مـافـيهم مـين ، غيـر بنـتـى ؟
وأجمـل مـافيكى يـا بنتـى ، ان انتـى ،
فـى عـنيكـى مـن نينتى .. حنـان الأم !

العــــلم

كـم ألـف مـرة يـا علـم يـا مـجيـــد
قـدام صفـوفنـا مشـيت خفيـف وسعيـــد
ومشينـا خـلفــك ننشــد الأنـاشـيــد
ونـشبـعــك بـالـحـب والـتـأيـيــد


كـم ألـف مـرة كــل صـبح جــديـــد
قبـل الضـبـاب مـايـنـقـشـع ويـبـيـد
شـفنـاك بـتصـعـد سـاريـة التـمجـيـد
وهـتـفـنـا ليـك وحـييـنـاك بـالايـــد


يـا بــؤرة الوطـنـيـة والـتـوحـيــد
يـا مصــدرالالهــام لـكـل مــريــد
نـمـوت وتبـقـى مـرتـفـع وعنـيـــد
على كـل شبــر ف مصــر يا صنـديـد
ولو فضـل فى الـدنيـا مصــرى وحيــد
رح يرفعـك يـا علم يـا مصــرى أكيــد
بكـل قلــب شـجــاع وزنـد حـديــد


اثــبـت مـكـانـك فــوق عــلاليـنـا !
فــوق كـل قـمـة مـن جـبـال سـينـا !
وعلى العــريـش رفــرف وكـون زينـة !
واكتب فى كـل قصـيــدة سـطر جـديـد .

الحـرب مـش نــزهـة

الحــرب مـش نـزهة ومـش تفـاريــح
مـش طبـل أجـوف يمـلا سمـع الريـــح
الحــرب لما تبقـى حــرب صحـيـــح
مـعـنـاهـا مـوت وألـم ودم يـسـيــح
راجـل لراجـل .. مـش بنــات قنـازيــح
على كتفهـم مــدفـع فشـنـك صفـيـــح
وشمـال يميـن يستعـرضـوا المفـاضيــح
ويـرقصــوا نهـودهـم بشكـل قـبـيــح



ويصـوروهـم مـأجـوريـن سـنـاكـيــح
سـايقين بطل مصـرى ف كـرامتـه جريـح
ويقولـوا دول أسـروه .. كـدب صـريـح !
ده كـان فـى يـونيـه اللى ماشـافـش قتـال
ودخلنـا فـى اكتـوبــر رجــال لرجــال
" إرحـم يـا مصــرى " بقـم يقولـم قـال
ويسحسـوا الأنـدال دمــوع تمـاسيــح .!

الأدب

العــلم قـــال

ان العيــال ،

يـلزم لانتاجهم رجال ،

ويـــا النســـا


وايه كمان العلم قال ؟ ..

قال لك ضرورى شـخص واحد بس ، علشان كل طفل ،

وضــرورى بــاب ،

وضــرورى قـفـل.

وضرورى حب ، انشالله ثانية.

ده ف بنـد حفظ النـوع …


لـكين بقى فى الأدب ،

قريت "نـهـايـة الأرب"

وفلاسفه مش من العرب ، ومن العـرب ،

وكلـهم قــالـــوا الكــــتاب

له فن تانى ، فن معـروف مـن زمـان.

يا فرنسواز هانم ساجان ! ..

آلهة

ايــزيس بتحب بـــوذا ،
وكـيـوبـيـد الســـبب.
بـاخوس سقـاهـا بـوظه ،
شـــوف قــلة الأدب ؟

حتحـور ، ومناف ، ونبتون ،
والـه بقــرون وديــل ،
طـلعوا الأولـمب هيلتـون ،
واتعـاركـوا فى الأوتيــل.

زيــوس اتحـــدى رع ،
فـى بـورصــة البشـر.
أبـوللو قـاللو هـــــع ،
فشــر فشــر فشــر !

والـكـل نـزلـوا ركـبـوا
عـربـيـات فـارهــه ،
ان خسـروا والا كــسبوا ،
الـكــل آلــهــة !